एप्रिल १९९७ च्या नैनीताल सहलीची आठवण आजही मनात ताजी आहे. हिमालयीन हवेची सुखद झुळूक, डोंगररांगांच्या कुशीतून चमकणाऱ्या चांदण्या, आणि सकाळी बाल्कनीतून दिसणारे शांत नैनी सरोवर—सगळेच जादुई! गुलाबी थंडीत आयता चहाचा कप आणि जोडीला निसर्गाचा देखावा! हे क्षण आजही बंद पापण्यांसमोर नैनीतालच्या हिमालयीन सौंदर्याची आठवण करून देतात. नैनीलेकवरील बोटींग, स्नो-व्ह्यू पॉइंटची सफर, आणि मॉल रोडवरील संध्याकाळचा फेरफटका—नैनीताल म्हणजे खरोखर कुमाऊंची राणी! .

सिक्कीम म्हणजे निसर्गसंपन्न हिमालयाच्या कुशीत वसलेली, आपला ऐतिहासिक, आध्यात्मिक आणि सांस्कृतिक वारसा जपणारी शहरे! सिक्कीम म्हणजे शांत दऱ्या-खोऱ्यांमध्ये “ओम मणि पदमे हम्” चा नाद करीत फडफडणारे  रंगीत प्रार्थना ध्वज आणि सुंदर आणि पवित्र बुद्ध विहार! सिक्कीम म्हणजे चहाच्या मळ्याचा सुगंध, ढगांच्या कुशीत हरवलेल्या हिरव्यागार टेकड्या आणि त्यांच्या मागे स्थितप्रज्ञासारख्या अविरत उभ्या हिमालयाच्या पर्वतरांगा!  

गुरुडोंगमार सरोवराची धवल रंगात मिसळलेली आकाशाची निळाई, लाचेन-लाचुंगच्या शांत दऱ्यांमधून पसरणारा सकाळचा धूसर प्रकाश, तितकीच तेथील साधी, उबदार माणसं! हे सगळं काही आपल्या मनात घर करून राहतं! लाचेन-लाचुंगच्या प्रवासात जाणवतं की, नॉर्थ सिक्किम हे केवळ एक पर्यटन स्थळ नाही, तर एक अनुभव आहे!